Ўзбекистон темирйўлчилари ва транспорт қурувчилари касаба уюшмаси Республика Кенгашининг 2016 йил 26 апрелдаги “Йилнинг энг фаол ёш мутахассиси” танловини ўтказиш тўғрисидаги раёсат қарорига кўра, “Ўзбекистон темир йўллари” АЖ МТУлари тасарруфидаги корхоналарда мазкур танлов ўтказилиб, унда 30 ёшгача бўлган темирйўлчилар касбий ва дунёвий билимларини синовдан ўтказишган эди. Яқинда ушбу танловнинг Республика Кенгаши босқичида иштирок этган касб эгалари ғолиблик учун ўз билим ва махоратларини намоён этишди. Унда МТУларга қарашли корхоналарнинг энг сара ёшлари бизнес лойиҳаларини шарҳлаш, рационализаторлик  иши бўйича билим ва кўникмаларини синовдан ўтказишди.

Танловда малакали ва тажрибали мутахассислардан иборат ҳайъат аъзолари иштирокчиларнинг ҳар чиқишини кузатиб, ҳар бир чиқишини кузатиб, холисона баҳолаб боришди. Қизиқарли савол-жавобларга бой ўтган танлов якунига кўра, 1-ўринга Тошкент темир йўл мухандислари институти “Бино ва саноат иншоотлари қурилиши” кафедраси доценти Саид Шоумаров сазовор бўлди. 2-ўрин Тошкент темир йўл транспорти касб-ҳунар коллежи махсус фан ўқитувчиси Салай Маткаримовга насиб этди. Қўқон минтақавий темир йўл узели касаба уюшма ҳудудий қўмитаси бош хисобчиси Элёржон Солиев эса учинчи ўринга лойиқ кўрилди.

Ўтган ҳафта “Ўзбекистон темир йўллари” АЖда “Йилнинг энг фаол ёш мутахассиси” танлови Республика Кенгаши босқичининг ғолиблари Ўзбекистон темирйўлчилари ва транспорт қурувчилари касаба уюшмаси Республика Кенгаши рахбарияти томонидан диплом ва эсдалик совғалари билан тақдирланишди.