Ижтимоий ҳимояга мухтож оилаларни ҳар томонлама қўллаб-қувватлаш борасидаги хайрли ишларда “Қарши минтақавий темир йўл узели” УК ва унинг тизимидаги корхона-ташкилотларнинг касаба уюшмалари қўмитаси бир қатор ишларни амалга оширмоқда. Хусусан, “Фаол инвестициялар ва ижтимоий ривожланиш йили” Давлат дастури ижросини таъминлаш мақсадида тармоқ тизимидаги корхона-ташкилотларда меҳнат қилаётган, кам таъминланган, кўп болали, боқувчисини йўқотган оилаларни, ижтимоий ҳимояга муҳтож касаба уюшма аъзоларини қўллаб-қувватлаш мақсадида 2019-2020 ўқув йилига 165 нафар эҳтиёжманд ишчи-ходимларнинг фарзандлари учун ўқув қуроллари ҳамда мактаб сумкаси олиб берилди. Бундан ташқари, ногиронлиги бўлган шахслар ва ўзгалар парваришига муҳтож 31 нафар кишилар байрам арафасида касаба уюшмасининг эътиборидан четда қолмадилар. Олий ўқув юртларида таҳсил олаётган иқтидорли, кам таъминланган ва чин етим талабаларга ўқув шартнома пулларини қисман тўловини амалга ошириш мақсадида моддий жихатдан қўллаб-қувватландилар. Ногирон фарзандлари бор оилаларга ҳам пул маблағлари ажратилди.

Таъкидлаш зарурки, бу каби хайрли ва эзгу ишлар энг аввало оилаларда, жамиятда ўзаро ҳамжиҳатлик, меҳр-оқибат, бағрикенглик ва хайр-саҳоват муҳитини янада мустаҳкамлаш, аҳоли турмуши сифатини оширишга хизмат қилмоқда. Энг муҳими эҳтиёжманд инсонларнинг эртанги кунга ишончи мустаҳкамланмоқда.