Қарши электр таъминоти корхонаси касаба уюшма қўмитаси ташаббуси билан  “Фаол тадбиркорлик, инновацион ғоялар ва технологияларни қўллаб-қувватлаш йили” Давлат дастурига мувофиқ  бир гуруҳ корхона ишчи-ходимлари учун қадимий ва ҳамиша навқирон Самарқанд шаҳрига саёҳат уюштирилди. Темирйўлчилар саёҳат давомида Самарқанд шаҳрининг қадимий ва тарихий обидалари, мадрасалари ва шаҳарнинг бугунги замонавий кўриниши билан танишишди.

— Самарқанд шаҳрига қилган саёҳатимиз давомида Ўзбекистон Республикаси Биринчи Президенти И.А.Каримовнинг қабрларини зиёрат қилдик ҳамда Регистон майдони, Гўри Амир, Шохи Зинда ва Дониёр пайғамбар мақбаралари каби муқаддас қадамжоларни зиёрат қилдик, — дейди Қарши электр таъминоти корхонаси касаба уюшма қўмитаси раиси Яраш Норқулов.  — Ишчи-ходимларнинг бўш вақтларини мазмунли ўтказиш мақсадида юртимизнинг диққатга сазовор масканлари бўйлаб саёҳатлар уюштириш касаба уюшма фаолларининг доимий диққат эътибор бўлмоқда.  Қадимий шаҳарга қилган саёҳатимиз барча темирйўлчиларда жуда катта таассурот қолдирди.