Ёш темирйўлчилар ўртасида китоб мутоаласи, китобхонлик маданиятини ошириш, уларнинг интеллектуал салоҳияти ва маънавий савиясини юксалтириш мақсадида ҳамда “Ўзбекистон темир йўллари” акциядорлик жамияти раҳбариятининг “Ёшлар ўртасида китобхонлик маданиятини ошириш тўғрисида”ги 578-НЗ сонли буйруғига асосан 12 апрель куни “Қўқон минтақавий темир йўл узели” унитар корхонаси кутубхонасида “Ҳар бир инсон ўқиши зарур бўлган 100 та китоб” чорлов акцияси доирасида китобхонлик бўйича маънавий-маърифий тадбир бўлиб ўтди. Тадбирга филология фанлари номзоди доцент Рашидхон Шукуров, Ўзбекистон Ёшлар иттифоқи Қўқон шаҳар кенгаши раиси Отабек Расулов, “Ёш китобхон” кўрик-танловининг Республика босқичи ғолиби Шарофатхон Исмоилова ва бир гуруҳ ижодкорлар таклиф этилди.

Ташриф буюрган меҳмонлар ўзларининг ҳаёт ва ижод йўллари ҳақида ҳозирги замон ёшларига ҳавас қилган ҳолда сўзлаб беришди ва ўзларининг ижод намуналаридан ёд олишди. “Ёш китобхон” танловининг Республика босқичи ғолиби Шарофатхон Исмоилова ўтказилган кўрик-танлов ва ундаги таассуротлар ҳақида гапирар берди. Китоб ўқиган одам ҳеч қачон кам бўлмаслигини ўзи мисолида сўзлаб берди.

“Ҳар бир инсон ўқиши зарур бўлган 100 та китоб” чорлов акцияси доирасида маънавий-маърифий тадбирлар, ижодий танловлар жумладан “Мен ўқиган китоб”, “Шеърхонлик”, “Китобхон” кичик танловлари ўтказилмоқда.

Қўқон минтақавий темир йўл узели корхоналарида 2232 нафар ёш мутахассислар фаолият юритади, ишловчи ёшлар орасида жаҳон ва ўзбек адабиётига қизиқувчи ёшлар ҳам талайгина, шуни инобатга олган ҳолда  Қўқон МТУ ёшлар иттифоқи етакчилари томонидан Ўзбек ва жаҳон адабиётининг таниқли, мазмун-мохиятга бой, ёшларни маънавиятга чорловчи  асарларининг электрон вариантлари яратилди. Электрон китоблар базаси МТУ кутубхонасига топширилди. Эндиликда ундан темирйўлчи ёшлар фойдаланишлари мумкин.