“Ўзбекистон темир йўллари” акциядорлик жамияти раҳбариятининг  “Қўнғирот минтақавий темир йўл узели” унитар корхонасида ишчи-ходимларни поездлар ҳаракат хавфсизлиги ҳамда меҳнат муҳофазаси масалалари бўйича ўқитишни ташкил этиш тўғрисида”ги буйруғи асосида “Қўнғирот минтақавий темир йўл узели” унитар корхонасида ўқув-машғулотлари ташкил қилинди.

 Унда “Ўзбекистон темир йўллари” акциядорлик жамияти ташишларни ташкил этиш, локомотив, вагон, электр, йўл хўжалиги, алоқа ва ишорат маркази, меҳнат муҳофазаси, техника ва саноат хавфсизлиги бошқармаси ҳамда Тошкент темир йўл муҳандислари институтидан  20 нафардан ортиқ мутахассис  узель  тасарруфидаги Жаслық, Қўнғирот, Нукус, Мискин, Урганч филиалларининг корхоналарида фаолият юритаётган темирйўлчиларнинг поездлар ҳаракат хавфсизлиги ҳамда меҳнат муҳофазаси бўйича билим-кўникмасини ошириш, тажрибаларини мустаҳкамлаш бўйича ўз билим-тажрибалари билан ўртоқлашишди.

Машғулотларда мутахассислар томонидан ўтган йилларда юз берган хато ва камчиликлар атрофлича муҳокама қилиниб, муайян тавсиялар берилганлигини айтиб ўтиш жоиз. Улар томонидан корхона ва объектларда меҳнатни муҳофаза қилиш талабларига риоя этилиши, ишчи-ходимлар соғлиги ва хавфсизлиги, махсус кийим-бош ва ҳимоя воситалари билан нечоғли таъминлангани ҳамда бахтсиз ҳодисалар юз бериши  эҳтимоли юқори бўлган корхоналарда меҳнат муҳофазаси ва техника хавфсизлиги бўйича тарғибот ишларининг  кучайтирилиши лозимлигига алоҳида эътибор қаратилди. Ўтказилган тадбирлар давомида кичик механизмлар, асбоб-ускуналар, хавфсизлик сигналлари, технологик жараёнлар ва норматив ҳужжатлар билан таъминланиш даражаси, ишчи-ходимларнинг  ижтимоий ҳимоясига қаратилаётган эътибор масалалари чуқур таҳлил этилди.

Шунингдек, темир йўл бўйлаб ишга бориш ва келиш тартиби, иш жойидан поездларни хавфсиз ўтказиш, темир йўлда ишларни тўғри ва хавфсиз ташкил этиш, баландлик ва электр асбоблари билан ишлаш, жароҳат олган ходимларга биринчи тиббий ёрдам кўрсатиш қоидалари тўғрисида батафсил маълумот берилди.

Бу тадбирлардан кўзланган асосий мақсад корхона ва ташкилотларда меҳнат шароитини яхшилаш, бахтсиз ҳодисаларнинг олдини олиш, нисбатан бахтсиз ҳодисалар эҳтимоли юқори бўлган корхоналарда бундай ҳолатларга йўл қўймаслик учун зарур чора-тадбирлар кўришдир. Зеро, бундай ҳолатларнинг олдини олишга кўпроқ аҳамият берилиши натижасида бахтсиз ҳодисаларнинг олдини олиш масаланинг муҳим жиҳатидир.

Мазкур тадбирларда 1500 нафарга яқин ишчи-ходим иштирок этди.