Пойтахтимиздаги “Локомотив” марказий жисмоний тарбия ва спорт клубида мини-футбол бўйича  “Ўзбекистон темирйўлчилари ва транспорт қурувчилари касаба уюшмаси Республика Кенгаши кубоги” мусобақаси  бошланди.

Унда Жамият бошқармалари, корхона ва ташкилотларда фаолият кўрсатаётган темирйўлчилар иштирок этишмоқда. Соҳа ходимлари орасида соғлом турмуш тарзини шакллантириш мақсадида ташкил этилган мусобақаларда жамоалар 4 гуруҳга бўлиниб, ҳар бир гуруҳда 4 тадан корхона вакиллари иштирок этишмоқда. Мусобақанинг дастлабки босқичида “А” гуруҳидан ўрин олган Капитал қурилиш дирекцияси, Вагон хўжалиги бошқармаси, Ўзбекистон локомотив депоси ҳамда “Ўзтемирйўлконтейнер” акциядорлик жамияти жамоалари беллашди.  Қизиқарли баҳсларга бой бўлган мусобақада Ўзбекистон локомотив депоси жамоаси ўз гуруҳида биринчи ўринни қўлга киритди.

Навбатдаги мусобақалар 9, 16 ҳамда 23 апрель кунлари бўлиб ўтади. Унда “Б” гуруҳида “Қуюв механика заводи” шўъба корхонаси, Тошкент юк вагон депоси, “Ўзтемирйўлмаштаъмир” унитар корхонаси ҳамда “Тошкент механика заводи” АЖ, “В” гуруҳида “Ўзтемирйўлҳисоб” маркази, Ахборот ҳисоблаш маркази, “Ўзтемирйўлйўловчи” АЖ, Ишларни бошқариш дирекцияси ҳамда сўнгги  “С” гуруҳидан Ҳарбийлаштирилган қўриқлаш бошқармаси, “Ўзтемирйўлэкспедиция” унитар корхонаси, Алоқа ва сигнализацияси бошқармаси ҳамда “Тошкент метрополитени” унитар корхонаси жамоалари ўрин олишган. Ушбу гуруҳларда биринчи ўринни қўлга киритган жамоалар ярим финал баҳсида ўзаро куч синашади ва ғолиб жамоалар финалга йўлланма олади.

Мусобақаларнинг финал босқичи  ва ғолибларни тақдирлаш маросими эса 5 май кунига белгиланган.