Наврўз айёми азалдан меҳр-оқибат, саховат, бағрикенглик ифодаси бўлиб келган. Ота-боболаримиз бундай кунларда фақат эзгу ишлар қилишга, кексаларнинг дуосини олиб, хаста-ю муҳтожларга меҳрибонлик кўрсатишга интилганлар. Ўтмишда Наврўз куни урушлар тўхтаган, гина-кудуратлар унутилиб, элда тинчлик, осойишталик қарор топган.

Бугунги кунда ҳам, истиқлол туфайли, мўътабар қарияларимиз, ота-оналаримизнинг ҳурмат-эҳтиромини жойига қўйиш, жамиятимизда меҳр-оқибат, катталарга ҳурмат ва кичикларга иззатда бўлиш, ҳеч кимни ёлғиз ва эътибордан четда қолдирмаслик ҳаётимизнинг бир бўлаги, қадриятга айланиб қолган. Айниқса, жорий Халқ билан мулоқот ва инсон манфаатлари йилида деб эълон қилиниши билан бундай эзгу ишларимиз тобора кучайтирилмоқда.

Бу йилги Наврўз байрами барча шаҳар ва қишлоқларимизда умумхалқ сайиллари тарзида ўтаётгани унга ўзгача файз ва шукуҳ бағишламоқда.

20-21 март кунлари эрта тонгдан бошлаб,  “Ўзбекистон темир йўллари” АЖ тасарруфидаги Марказий темирйўлчилар маданият саройи ҳудудидаги боғда Наврўз умумхалқ байрами муносабати билан халқ сайиллари ўтказилди.

Карнай-сурнай садолари остида бошланган сайлда Марказий темирйўлчилар маданият саройи қошидаги “Ниҳол”, “Зиё” ансамбллари ва “Серпантинки” намунали болалар рақс жамоаси ҳамда “Ўзбек наво” эстрада бирлашмаси томонидан элимизнинг таниқли хонандалари ва жамоалари  миллий урф-одат ва анъаналарга, бетакрор қадриятларимизга садоқат, юртни кўз қорачиғидек асраш, ватанпарварлик туйғулари акс эттирилган саҳна кўринишлари намойиш этилди. Наврўз тарихига оид маълумотлар, миллий урф-одатларимизга оид бадиий чиқишлар барчага кўтаринки кайфият улашди.

Сайл доирасида халққа сумалак, кўк сомса каби баҳорий таомлар юртимизда етиштирилган нозу-неъматлар намойиши, халқ ўйинлари ташкил этилди. Сайлга ташриф буюрганлар учун ош ва бошқа таомлар тайёрланди.

Сайлга темирйўлчилар, транспорт қурувчилари, метрополитен ходимлари ва уларнинг оила аъзолари, фахрийлар ҳамда Тошкент шаҳар аҳолиси ташриф буюришди. Боғ ҳудудида болажонлар қувнаб ўйнашлари учун батут, ўзи юрар машиналар ва каруселлар ўрнатилиб, унда болалар мириқиб ўйнашди.

Шунингдек, жамиятимизда меҳр-оқибат ва ҳамжиҳатлик, инсонийлик, бағрикенглик ва бунёдкорлик, хайр-саховат муҳитини янада мустаҳкамлаш, ёш авлодни миллий анъаналаримизга садоқат ва умуминсоний қадриятларга ҳурмат руҳида камол топтириш ҳамда Наврўз умумхалқ байрамини муносиб кутиб олиш мақсадида тармоқ касаба уюшмаси Республика Кенгаши ташаббуси билан “Энг яхши китобхон” мавзусида викторина ташкил этилиб, унда ўзининг билими ва кўп китоб ўқиганлиги билан тайёрланган саволларга тез ва тўғри жавоб берган иштирокчиларга эсдалик совғалари топширилди.