Жорий йилнинг 25 сентябрь куни “Кўприкқурилиш” трести УК бошқарувчиси ўринбосари Р.М.Хонкелдиев ҳамда трест бирлашган касаба уюшма қўмитаси раиси Б.Х.Абдуллаев бошчилигида трест ва корхоналар кадрлари, меҳнат муҳофазаси бўлимлари мутасадди ходимлари ҳамда корхоналар бошланғич ташкилотлари раислари иштирокида қўшма мажлис бўлиб ўтди. Унда трест меҳнат муҳофазаси ва ишлаб чиқариш экологияси бўлими бошлиғи Ж.В.Толабоев трест корхоналарида 2019-2020 йиллар кузги-қишки мавсумга тайёргарлик бўйича мўлжалланган ишларни амалга оширилиши тўғрисида маълумот бериб, ҳозирга келиб тайёргарлик ишлари 87 фоизга бажарилганини билдирди. Шунингдек, трест корхоналарида биринчи марта қишловчи ишчиларни ўқитиш, ишчиларга меъёр бўйича қишки куртка, оёқ кийими ва шахсий ҳимоя воситаларини тарқатиш, корхоналардаги айрим техник воситаларини антифриз, автомашиналар билан таъминлаш бўйича бир қатор ишлар олиб борилаётганини таъкидлаб ўтди. Йиғилишда айрим трест корхоналаридаги тайёргарлик ишларини суст олиб борилаётганлиги бўйича танқидий фикрлар ҳам билдирилди. Иш режани бажаришда трест ҳамда корхоналар меҳнат мухофазаси ва техника хавфсизлиги, кадрлар бўлимининг мутасадди ходимлари, корхоналар бошланғич касаба уюшма ташкилоти раислари жалб қилиниб, улар режада белгиланган кунлари қурилиш объектларида бўлиб, режадаги тадбирларни бажарилиши билан яқиндан танишиб, аниқланган камчиликларни бартараф этиш бўйича чора-тадбирларни амалга оширишда амалий ёрдам кўрсатишлари лозимлиги таъкидланди.