Халқимизнинг қадр-қиммати, ор-номусини, миллий анъаналаримиз ва урф-одатларимизни ҳимоя қилишда, босқинчи ва ёвуз кучларга қарши машаққатли курашларда букилмас ирода ва жасорат намунасини амалда намоён этиб, бугунги тинч ва осойишта кунлар учун жонини фидо қилган аждодларимизнинг муқаддас хотирасини ёд этиб, эзгу ишларини давом эттириш – бизга тинчлик, омонлик керак, деб яшайдиган бағрикенг халқимизга хос азалий қадриятдир.

Бутун дунёда миллионлаб инсонлар ҳалок бўлишига сабаб бўлган, мислсиз йўқотишлар, талофат ва мусибатлар олиб келган Иккинчи жаҳон уруши инсоният тарихидаги энг даҳшатли, энг қонли қирғин бўлганини ҳеч ким унутмайди. Ушбу бешафқат урушда қатнашган 1,5 миллиондан ортиқ ўзбекистонликларнинг ярим миллиондан зиёди ҳалок бўлганини халқимиз ҳеч қачон ёдидан чиқармайди. Уруш бошланиши билан фронт ҳудудларидан Ўзбекистонга кўчирилган бир миллионга яқин оила ва болаларни қабул қилиб, охирги бир бурда нонини улар билан баҳам кўрган, “Сен етим эмассан” деб ўз бағрига олгани халқимизнинг нақадар олижаноблигини, меҳр-мурувватини, юксак маънавиятини яққол намоён этди.

“Қуюв-механика заводи” ШК раҳбарияти ва касаба уюшма қўмитаси  9 май – Хотира ва Қадрлаш куни муносабати билан  кекса темирйўлчи, Иккинчи жаҳон уруши қатнашчиси Нурали бобо Салимбаев холидан хабар олиб,  корхона раҳбарияти томонидан 2 миллион сўм пул мукофоти ва касаба уюшма қўмитаси томонидан озиқ-овқат маҳсулотлари топширилди. Шу билан бир қаторда касаба уюшма қўмитаси томонидан 6 нафар Афғон уруши қатнашчиларига “Устозлар изидан” деб номланган гала концерт дастурига бепул чипталар берилди.