«Ўзбекистон темир йўллари» акциядорлик жамиятига қарашли “Ўзтемирйўлмаштаъмир” унитар корхонаси ҳамда  “Ўзтемирйўлконтейнер” акциядорлик жамияти маънавият ва маърифат бўлими ҳамда касаба уюшмалари ташкилоти ташаббуси билан “Шахс психологияси” мавзусида давра суҳбати ташкил этилди.

Тадбирда психология фанлари номзоди, доцент Луқмон Казаков шахс психологияси, феъл-атвори, темпераментлари ҳақида батафсил ва қизиқарли маълумотлар билан ўртоқлашди. Ҳар бир инсоннинг ижтимоий олам билан алоқаси унинг тажрибаси, маданияти ва ижтимоий хулқ нормалари доирасидаги ҳаракатларида намоён бўлишини аниқ илмий мисоллар ёрдамида баён этди.

Шунингдек, инсоннинг туб моҳиятини англаш, унинг ривожланиши ва камол топиши қонуниятлари ҳақида маълумот берар экан, Абу Наср Фаробий, А.Навоий, Ибн Сино, Беруний каби юзлаб Шарқ алломалари ҳам шахс тушунчасини фалсафий ва ижтимоий сирларини очишга ўзларининг энг дурдона асарларини бағишлаганларини таъкидлаб ўтди.

– Ижтимоий турмушда ҳаёт ва фаолият кўрсатаётган ҳар қандай шахс ўзининг индивидуал психологик хусусиятлари билан бошқа инсонлардан ажралиб туради. Ва бу хусусиятни, яъни ўзининг руҳий ҳолатини ўрганишга, таҳлил қилишга қизиқади. Шу маънода бугунги тадбир ишчи-ходимларда катта қизиқиш уйғотди, қолаверса, улар ўзлари учун зарур ва фойдали маслаҳатларни ҳам олдилар, – дейди  “Ўзтемирйўлконтейнер” акциядорлик жамияти касаба уюшма қўмитаси раиси Нигора Шакирходжаева.

Қизиқарли маълумот ва мушоҳадаларга бой ўтган давра суҳбати иштирокчилари ўзларини қизиқтирган саволларга жавоб олди.