“Қуюв механика заводи” шўъба корхонаси касаба уюшма қўмитаси томонидан Тошкент шаҳридаги Оқсарой қароргоҳида ташкил этилган Ислом Каримов номидаги илмий-маърифий ёдгорлик мажмуасига ҳамда “Темурийлар тарихи давлат музейи”га корхона ишчи-ходимларининг ташрифлари ташкиллаштирилди.

— Корхонамиз ёшларини халқимизнинг бебаҳо маданий мероси, миллий ва умумбашарий қадриятлар, илм-фан ёдгорликлари билан яқиндан таништириш, уларда Ватанга муҳаббат, истиқлол ғояларига садоқат туйғусини мустаҳкамлаш, ёшларда ватанпарварлик, тарихимиз ва буюк аждодларимиз мероси билан фахрланиш туйғусини кучайтириш мақсадида мана шундай маънавий тадбир ташкил этилди, — дейди корхона касаба уюшма қўмитаси раиси Ш.Султонов. — Айниқса, Ўзбекистон Президенти ҳузуридаги Ўзбекистон Республикасининг Биринчи Президенти Ислом Каримов номидаги илмий-маърифий ёдгорлик мажмуасига ташриф барча темирйўлчиларга манзур бўлди.

Улкан давлат арбоби, ўз ҳаётини мустақил давлатимиз қурилиши ва шаклланишига, унинг жаҳондаги мавқеини мустаҳкамлашга бағишлаган, юртимиз ва халқаро майдонда катта обрў-эътибор қозонган Ўзбекистон Республикасининг Биринчи Президенти Ислом Абдуғаниевич Каримовнинг ҳайкали пойига гулчамбарлар қўйилди.