“Тошкент механика заводи” акционерлик жамиятида “Ўзбекистон Республикаси Президенти сайловидаги қонунлар ва жаҳондаги халқаро вазиятлар” мавзуида семинар ташкил этилди.
Тадбирда корхона раҳбарияти ва ишчи-ходимлари, ҳамда Тошкент юридик университети доценти, юридик фанлар номзоди И.Кудрявцевлар иштирок этди.
Игор Кудрявцев мавзу доирасида маъруза қилар экан, жорий йил 4 декабрь куни бўлиб ўтадиган Ўзбекистон Республикаси Президенти сайловига тайёргарлик ва сайлов ўтказилишидаги қонунлар ҳақида гапириб берди.
Тадбир қатнашчилари фуқаролар сайлов ҳуқуқларининг ишончли ҳимоясини таъминлашнинг ташкилий-ҳуқуқий механизмларини шакллантириш, фуқароларнинг сайлаш эркинлиги ҳамда жамият ва давлат ишларини бошқаришда иштирок этиш ҳуқуқини амалга оширишнинг ҳуқуқий кафолатлари борасидаги миллий ҳамда хорижий тажрибани кўриб чиқдилар.
Ўзбекистонда давлат бошқаруви изчил модернизация қилиниши натижасида фуқароларнинг сайлов ҳуқуқи ва эркинликларини таъминлаш бўйича энг юқори халқаро демократик тамойил ҳамда стандартларга жавоб берадиган самарали ҳуқуқий асос яратилгани алоҳида таъкидланди. Ҳуқуқий ҳимоя чоралари фуқароларнинг мурожаатларини суд билан боғлиқ бўлмаган ҳамда суд жараёнида мустақил, шаффоф ва холис кўриб чиқиш воситалари мажмуини ўз ичига олади.
Шунингдек, маърузачи жаҳонда бўлиб ўтаётган халқаро вазиятлар ҳақида айтиб ўтди. Яқин Шарқ давлатлари Сурия, Ироқ ва Ливан ҳудудларида бўлиб ўтаётган урушлар ва юз минглаб мутлақо бегуноҳ одамлар ҳаётига зомин бўлган жуда кўп фожеали воқеалар ҳақида, Америка ва Европа давлатларида бўлиб ўтаётган воқеаларнинг бошқа мамлакатларга таъсири ва бошқа давлатлар сингари бизнинг давлатимизга ҳам таъсир кўрсатмаслиги учун, юртимиз хавфсизлиги ва тараққиётига бўлган ҳар қандай кўринишдаги таҳдид ва хуружларга нисбатан биз доимо огоҳ бўлишимиз кераклигини, Мустақиллигимизни кўз қорачиғидай асраб-авайлашимитз кераклигини айтиб ўтди.
Тадбир амалий мулоқот ҳамда фикр алмашиш руҳида ўтди.