“Локомотив” жисмоний тарбия спорт клубида “Кўприкқурилиш трести” унитар корхонасининг касаба уюшма қўмитаси ҳамда Ёшлар иттифоқи етакчилар кенгаши ташаббуси билан ёш ишчи-ходимлар ўртасида мини футбол мусобақаси ташкил этилди.

Унда корхонанинг “Кўприкқурилиш трести” марказий аппарати, “13-кўприкқурилиш отряди”, “67-кўприкқурилиш отряди” ва “Кўприкқурилишбутлаш” шўъба корхонасидан 4 та жамоа қатнашди.

Корхона ходимлари нафақат футбол, балки спортнинг бошқа турлари бўйича ўтказилаётган мусобақаларда ҳам ўз маҳоратларини намойиш этиб келмоқдалар. Бунда касаба уюшма қўмитаси томонидан кўрсатилаётган амалий кўмакни алоҳида эътироф этиш лозим. Зеро, бунинг самараси ўлароқ, меҳнат жамоаларида қатор оммавий-маданий спорт тадбирлари ташкил этилаяпти.

Айтиш жоизки, беллашувларда барча иштирокчилар ўзларининг нималарга қодир эканликларини намойиш этишди. Ҳужумларни ташкил этиш, рақиб жамоаси дарвозасига йўл топишда бор маҳоратларини кўрсатишди. Бироқ, якунда омад фақат кучлиларгагина кулиб боқиши яна бир бор аён бўлди. Мусобақада биринчи ўрин “Кўприкқурилишбутлаш” шўъба корхонаси жамоасига насиб этди.  Ғолиб жамоа мусобақа кубоги, диплом ва эсдалик совғалари билан тақдирланди.

Мусобақа ўйинларида фаол иштирок этган, яхши натижаларни кўрсатган жамоаларга ҳам эсдалик совғалари топширилди.