“Локомотив” марказий жисмоний тарбия ва спорт клубида 2017 йил — Халқ билан мулоқот ва инсон манфаатлари йили муносабати билан аёллар ўртасида спартакиада ўтказилди.

“Ўзбекистон темир йўллари” акциядорлик жамиятига қарашли корхона ва ташкилотларда меҳнат қилаётган ходимлар бир нечта шарт бўйича ўзаро беллашдилар.

Темирйўлчилар дартс, шашка, стол тенниси ва эстафета баҳсларида ўз имкониятларини синовдан ўтказишди. Тизим корхоналарида спортга бўлган қизиқишнинг юқорилиги ва ходимлар жисмоний тарбия билан мунтазам шуғулланишлари беллашувлар давомида яққол кўзга ташланди. Соғлом рақобат спартакиадаги ўзгача завқ бағишлади. Энг қизиқарли ва муросасиз шартлардан бири бўлган жамоавий эстафетада “Ўзтемирйўлконтейнер” акциядорлик жамияти жамоаси қизларига тенг келадиган рақиб топилмади. Улар арқонда сакраш, копток билан югуриш, теннис коптокчасини туширмасдан илдамлаш каби шартларни ўз ичига олган эстафетада 1-ўринни банд этишди.

— Хурсандчилигимнинг чеки йўқ, — дейди мусобақа ғолиби Муҳаббат Ғуломова. — Эстафета жисмоний беллашув бўлгани учун барчамиз бир тану бир жон бўлиб ҳаракат қилдик ва якунда ғолиблик насиб этди. Қолган шартларда ҳам муносиб иштирок этдик. Мусобақанинг энг ёш иштирокчиси бўлганим учун алоҳида тақдирландим. Қизиғи ўтган йил ҳам мазкур соврин менга насиб этган эди.

Шунингдек, Лидия Демченко, Заҳро Мусаева, Малика Зайнутдинова ва Мавлуда Икромовалар ғолиблар сафидан жой олишди. Спартакиаданинг барча иштирокчилари ташкилотчилар томонидан муносиб тақдирланишди.